Bilboko ondarea zabaltzeko Bilbao Izan programaren esparruan, aurten lanean jarraituko dugu Bilboko auzoen historia ikertzeko, biltzeko, dokumentatzeko, zabaltzeko eta transmititzeko.
Zehazki, hauek izango dira 2024an garatuko diren ekimen nagusiak, kronologikoki ordenatuta:
"IGAROTAKO ISTORIOAK GAURKO MEMORIAN: Otxarkoaga, Abando, San Ignazio eta Zabala" – Proiekzioen eta hitzaldien zikloa
Saio bakoitzean, lehenik eta behin, Txio Ta Txio serieko bideoak proiektatuko dira, auzo bakoitzean fokua jarri zutenak, bere garaian bildutako anekdotak, gertakariak eta bitxikeriak ikusi eta entzun ahal izateko.
Proiekzio horien ondoren, gonbidatutako hizlariek lau auzoen historia deskribatu eta kontatuko digute, ikuspegi desberdin batetik: bizipen pertsonala Otxarkoagaren kasuan, Abandoko elizateari buruzko ikerketa- eta dokumentazio-lana, San Ignazio eta Elorrieta auzoetako argazki zahar ugarien erakusketa, eta, azkenik, ariketa kolektibo baten bidez, Zabala auzoaren -trenbideko langileen auzoa- eraikuntzaren mendeurrena gomutatuko da.
Hori guztia maiatzaren 7an, 8an, 14an eta 15ean egingo da, aipatutako auzoetako udaltegietan.
GURE AUZOAK ESZENARA – Bisita gidatu antzeztuak
Gure auzoak eszenara izenarekin, gai jakin bati buruzko ibilbide antzeztuak egingo dira Bilboko zortzi barrutietako auzo banatan. Aukeratutako auzoen historia eta garapena ezagutaraztea da helburua, historiako pertsonaia esanguratsuak, ohiturak, anekdotak eta gertaerak nabarmenduz, ibilbidean zehar bizitza berreskuratzen joango baitira.
Bisita gidatuak izango dira, oinez egitekoak eta doakoak, ibilbide atsegina eta irisgarria izango dute, eta kasuan kasuko garaiko jantziekin karakterizatutako pertsonaiak ere egongo dira.
Bisita gidatuak maiatzeko bigarren hamabostaldian hasiko dira eta urriko lehen hamabostaldian amaituko dira. Abuztuan ez da bisitarik egingo. Hauek dira ibilbide horietarako aukeratutako auzoak: Zorrotza, Indautxu, Otxarkoaga, Iralabarri, Uribarri, San Adrian, Begoña eta Deustu.
Ekimen honi eta plazen erreserbari buruzko informazio guztia www.bilbaoizan.eus webgunean egongo da eskuragarri.
TXIO TA TXIO: 100 urte Begoñaren eta Deusturen anexioetatik
Facebook + Instagram: Bilbao Izan / Facebook + Instagram + X + YouTube: Bilbao Kultura
ARGAZKINETA: Mintegitxueta, Masustegi y Altamira
Denboraren joanak bizilagunen memoria ez ezabatzeko eta, aldi berean, iraganeko denbora ahanzturan geratu ez dadin, hiru auzo horietako etxeetan gordetzen den material guztia biltzearen, digitalizatzearen eta kontserbatzearen garrantzia azpimarratzen jarraituko dugu. Material horiek artxibatzeko berreskuratzeaz gain, bizilagunek euren istorioak, oroitzapenak, testigantzak eta gertakariak kontatzeko aukera izango dute, bildutako eta digitalizatutako informazioa osatze aldera. Azkenik, parte-hartze bidezko ekitaldi publiko eta ireki batean, parte-hartzaileei eta, oro har, bizilagunei proiektu hau garatzen den hilabeteetan zehar bildutako dokumentu eta argazki zaharrak eta grabatutako testigantzen bideoak erakutsiko zaizkie.
BILBAO BALIOEN HIRIA
Bilbao Izan erabat bat dator Bilbao Balioen Hiria proiektuarekin, Bilbon balio partekatuen esparru bat sustatu nahi baitu. https://balioenhiria.bilbao.eus/eu/
