Hau Argazkineta-ren bostgarren edizioa da. Berarekin, Bilboko auzoetan barrena ibiltzen jarraitzen dugu, denboraren joanak auzotarren oroimena ezaba ez dezan eta, aldi berean, iragandako denbora ahanzturan eror ez dadin. Eta, horregatik, etxean gordetzen dugun material guztia biltzearen, digitalizatzearen eta kontserbatzearen garrantzia azpimarratzen jarraitzen dugu. Izan ere, XX. mendean zehar bizi izan garenok eraldaketa handien zuzeneko lekuko izan gara. Etxean badauzkagu argazkiak, diapositibak, negatiboak, prentsa-zatiak, fanzineak, pegatinak, bideoak eta abar, ez oso aspaldiko lekuak, oroitzapenak eta bizipenak erakusten dituztenak. Material hori guztia, zeina batzuetan garrantzirik gabekotzat daukagun, leku ahaztuetan pilatzen zaigu, eta, batzuetan, zaborretarako hautagai sendoa ere izaten da. Oroitzapen horiek desagertzea izango litzateke gure auzoetako garai bateko istorio garrantzitsuak agertzen dituzten dokumentuak galtzea. Material horiek artxibatzeko berreskuratzeaz gain, bizilagunek euren istorioak, oroitzapenak, testigantzak eta gertakariak kontatzea nahi dugu, bildutako informazioa osatzeko.

Lagun iezaguzu Castaños, Matiko eta Loruri etxalde auzoetako XX. mendeko kontakizuna modu kolektiboan eraikitzen. Lagun iezaguzu belaunaldi gazteagoei edo auzokide berriei helarazten zer bizi izan den auzoan eta zer ezkutatzen duen txoko ezezagun bakoitzak. Hurbildu, egin zure ekarpena eta kontatu.