“BILBAO DISTRITO JAZZ” OSTIRAL HONETAN JARRIKO DA MARTXAN, AUZOETAN ERREPERTORIO ANITZA, EGUNGOA ETA KALITATEZKOA ESKAINTZEKO APUSTUA EGITEN DUEN PROGRAMAZIOAREKIN

“Bilbao Distrito Jazz” Udaleko Kultura Sailaren ekimena da, Bilbaína Jazz Club izenekoarekin elkarlanean. LAU emanaldi jasotzen ditu, beti ere OSTIRALETAN, arratsaldeko 19:30ean. Sarrera librea izango da, leku guztiak bete arte.

Begoñako, Otxarkoagako eta Errekaldeko udaltegiek eta Juan Crisóstomo de Arriaga Musika Kontserbatorioak jasoko dituzte Half Quartet Plus Two, Jacob Sacks Trío, Miguel Fernández Quartet eta Martin Laiton Quartet taldeen kontzertuak.

OSTIRAL honetan inauguratuko da “Bilbao Distrito Jazz” egitarauaren hemezortzigarren edizioa. Oraingo honetan, jazz garaikideenean nagusi diren artistez osatutako eskaintza anitza eta kalitatezkoa, eta genero horretako bertako artista gazteek eskainiko duten inaugurazio kontzertua proposatzen dira. Bilboko Udaleko Kultura Sailak, Bilbaína Jazz Club-arekin elkarlanean, sustatzen duen ekimen hau erabat sendotuta dago gure Hiribilduko kultur agendan, hiriko hainbat barrutitan eskaintzen diren doako kontzertuen eskaintza deszentralizatuaren bitartez.

Ohikoa denez, “Bilbao Distrito Jazz”, OTSAILEKO eta MARTXOKO bata bestearen osteko lau ostiraletan ospatuko da, arratsaldeko 19:30etik aurrera, hainbat estilotako lau bandarekin, eta Euskadin egiten den jazzaren ordezkaritzarekin. Izan ere, aurreko urteetan bezala, programak nazioarteko musikarien presentzia eta bertako talde baten partaidetza uztartuko ditu. Oraingo honetan, Amsterdamen bizi den Unai Olabarri artista bilbotarra buru duen Half Quartet Plus Two taldea izango da ostiral honetan, OTSAILAREN 17an, Begoñako Udaltegian programazioa irekiko duena.

Hard bop, cool eta free eraginak dituen laukote horretako kideak Musikenen (Euskadiko Musika Goi Kontserbatorioan) ezagutu ziren, eta ordutik, ikasteko eta esperientzia hartzeko baliagarriak izan zaizkien hainbat taldetan aritu dira. Bi saxofoi altu, baxu elektrikoa eta bateria dituen talde atipikoak soinu modernoa eta ez oso ohikoa ematen dio taldeari.

OTSAILAREN 24an, Sarrikoko Juan Crisóstomo Arriaga Musika Kontserbatorioak Jacob Sacks Tríoren emanaldia jasoko du. New Yorkeko jazz eszenako piano jole sortzaileenetakoa da. Bere ahots berezia talde askotan entzun da, estilo eta lengoaia guztietako izar handien ondoan. Azken 15 urteetan Jacob hainbat taldetako kide izan da, diskoak grabatu eta zenbait bira egin ditu Estatu Batuetatik, Europatik eta Kanadatik. Clark Terryrekin, Joe Manerirekin, Terumasa Hinorekin edo Charles Gaylerekin aritu da, besteak beste.

Martxoko lehen ostiralean, MARTXOAREN 3an, Otxarkoagako Udaltegiak Miguel Fernández Quartet talde euskal-katalanaren emanaldia jasoko du. Miguel Fernándezek, estatuko eszena garaikideko saxofoi jole garrantzitsuenetakoak, bere azken diskoa aurkeztuko du jendearen aurrean: Jason Palmerren, Marco Mezquidaren, Masa Kamaguchiren eta David Xirguren partaidetza duen “Ocean Blood”. “Transplanet Species” bere aurreko lanak 2010eko Jazz Diskorik Hoberenaren saria lortu zuen, eta sariak lortu zituen BBK JAZZ eta Jaç/Grupo Enderrock jaialdietan.

“Bilbao Distrito Jazz” ekimenaren hemezortzigarren edizio hau Martin Leiton baxu eta kontrabaxu jole, konposatzaile eta moldatzaile kanariarra buru duen bandak itxiko du, MARTXOAREN 10ean, Errekaldeko Udaltegian. Martín Leiton, bere ibilbidea jazzean egin duen musikaria da, baina baita folklore latinoamerikarrean, musika afroamerikarrean edo flamenkoan ere. Hainbat musika tresna jotzen ditu, kontrabaxua, baxu elektrikoa, gitarra eta pianoa, konposatzaile eta moldatzaile gisa aritzeaz gain. Bi disko argitaratu ditu.

Aurreko edizioetan bezala, kontzertu guztiak arratsaldeko 19:30ean hasiko dira. Sarrera librea eta doakoa izango da leku guztiak bete arte, eta ez zaio inori aretora sartzen utziko aretoa bete eta gero.

“Bilbao Distrito Jazz” Bilboko Udaleko Kultura Sailaren ekimena da, eta hainbat helburu ditu, besteak beste, ikus-entzule askorik ez duen musika genero hori hiriko auzoetara zabaltzea, ikus-entzule berriak sortuz; 1991tik astero zuzeneko emanaldiak antolatzen dituen Bilbaína Jazz Club elkartearen lana laguntzea; edo auzoetan eskaintzen den kultur programazioaren kalitatea hobetzea.

Beste alde batetik, Udaleko Kultura Sailaren esku dagoen Bilboko Udal Liburutegien Sareak, jazz-liburu eta grabazioen bilduma zabala ere badaukala azpimarratu gura du, maileguan uzteko, musika genero hori sustatzeko xedez. Katalogoa webgune honetan dago eskuragai: www.bilbao.eus/bibliotecas. Gainera, erosketak egiteko edo bilduma eguneratuta edukitzeko iradokizunak ere egiten ditu.

AGENDA

OTSAILAK 17. 19:30
Half Quartet Plus Two (Begoñako udaltegia)
Josu Salegi (saxo altua)
Laurent Robino (saxo altua)
Dani G. Lisón (baxua)
Unai Olabarri (bateria)

OTSAILAK 24. 19:30
Jacob Sacks Trío (Juan Crisóstomo Arriaga Musika Kontserbatorioa)
Jacob Sacks (pianoa)
Masa Kamaguchi (kontrabaxua)
Vinnie Sperrazza (bateria)

MARTXOAK 3. 19:30
Miguel Fernández Quartet (Otxarkoagako udaltegia)
Miguel Fernández (saxo tenorea) 
Marco Mezquida (pianoa)
Masa Kamaguchi (kontrabaxua)
David Xirgu (bateria)

MARTXOAK 10. 19:30
Martin Laiton Quartet (Errekaldeko udaltegia)
Santi de la Rubia (saxo tenorea)
Toni Saigi (pianoa)
Martín Leiton (kontrabaxua)
Andreu Pitarch (bateria)

Kontzertu guztiak arratsaldeko 19:30ean hasiko dira. Sarrera doakoa leku guztiak bete arte.

Informazioa 010 telefono zenbakian edo www.bilbao.eus eta www.kulturabarrutik.eus webguneetan.