Eusko Ikaskuntzak Bilboko Udalaren laguntzarekin antolatutako dibulgazio eta eztabaida foroa, historia egin zuten arren, era bidegabean historiatik baztertuta geratu ziren emakumeengan zentratuko da edizio honetan.
Bilboko Udaleko Kultura Sailaren esku dagoen Bidebarrieta Kulturguneak, duela bi hamarkadatik Eusko Ikaskuntzak, Bilboko Udalaren laguntzaz, antolatzen duen Bilboko Historiari buruzko XX. Symposiuma jasoko du datorren 28an eta 29an. Oraingo honetan, Hiriaren historia genero ikuspegitik aztertzea proposatzen du, historia egin zuten arren, era bidegabean historiatik baztertuta geratu ziren emakumeengan zentratzeko.
“Emakumeak Bilboren Historian” izeneko dibulgazio eta eztabaida topaketak, emakumeak Bilboren historian izan duen lekua azpimarratu gura du bere hogeigarren urteurrenean, konpromisoz betetako leku garrantzitsua, baina neurri handian isildutakoa. Horrela, hogei ikerlari eta aditu inguruk, banaka edo taldean, gure hiriaren politikan, gizartean, ekonomian eta kulturan nolabaiteko protagonismoa izan zuten emakumeen historia berreskuratu nahi du.
Symposiuma astelehenean, arratsaldeko 17:00etan, hasiko da, liburutegiko ekitaldi aretoan. “Mujer y represión en la dictadura franquista” izeneko inaugurazio hitzaldia Mirta Núñez Madrilgo Unibertsitate Complutenseko Gizarte Komunikazioaren Historia saileko irakasle titular eta Oroimen Historiko Katedrako zuzendariak emango du. Irakaslearen lanen ikerketa ildo nagusietakoa, bere lanaren parte handiaren ardatza, Diktaduran frankismoaren biktimak izan zirenak dira, zaurgarrienak azpimarratuz: umeak eta emakumeak.
Mirta Núñez Madrilgo Unibertsitate Complutenseko Informazio Zientzien Fakultatean lizentziatu zen 1983an, “La Prensa de las Brigadas Internacionales” tesinarekin, eta 1988an “La prensa de guerra en la zona republicana durante la Guerra Civil española (1936-1939)” izeneko doktoretza tesia irakurri zuen. Jatorriz kubatarra da, Mirta Díaz -Balarten, Fidel Castroren lehenengo emaztearen, alaba da.
Symposiumaren hasierako jardunaldirako programatu diren gainerako hitzaldiak, XVI. eta XVIII. mendeetan emakumeak Bilboko erlijio bizitzan bete zuen lekuan, Zamakolada izenekoan izan zuen partaidetzan edo Teresa Nadal emakume sozialista bilbotarraren militantzian eta erbestean zentratuko dira, besteak beste.
Asteartean, azaroaren 29an, saioak arratsaldeko 17:00etan hasiko dira, eta zortzi hitzaldi izango ditugu. Hasteko, Eusko Ikaskuntzako Eduardo J. Alonso historialariak, XIX. eta XX. mendeetako emakume enpresarietan zentratutako hitzaldia eskainiko du. Aurkeztuko diren beste lan batzuk emakumeek joan den mendeko 20ko hamarkadan Bilboko merkataritzan egin zuten lanean, emakumeek Errepublikaren aldeko Bilboko mugimenduan izan zuten partaidetzan, edo 1820an, Bilbon argitaratutako Carta Pastoral del Primado de las Españas lana euskarara itzuli zuen Bizenta Mogel idazlearen figuran zentratuko dira. Jardunaldia, Toti Martínez de Lezea idazle arabarrak eskainiko duen “Otra historia de la mujer vasca” hitzaldiarekin amaituko da.
Eusko Ikaskuntza Symposiuma urtero egiten da 1996tik Bidebarrieta Kulturgunea kultura espazioan, Eusko Ikaskuntzak berak eta Bilboko Udaleko Kultura Sailak antolatuta, Bilboren eta Euskal Herriaren historiari buruzko zenbait atal era monografikoan lantzeko, gure historian sakontzeko eta berau kontserbatzeko helburuz.
BIDEBARRIETA KULTURGUNEA, Bidebarrietako liburutegiaren barruan, helburu nagusi liburuaren eta literaturaren garapena eta hedapena dituen gunea da.
+ INFO:
http://www.eusko-ikaskuntza.eus/es/eventos/xx-symposium-de-historia-de-bilbao-mujeres-en-la-historia-de-bilbao/gd-35/
